Tanzania yaherukaga gutangaza amakuru ajyanye na Covid-19 ku wa 29 Mata aho yari yavuze ko abamaze kwandura bose ari 509 mu gihe abari bamaze kwitaba Imana bari 21.

Mu kiganiro yatanze ku wa 15 Kamena, Minisitiri w’intebe wa Tanzania Kassim Majaliwa yavuze ko abarwayi bose bahari uko ari 66 bashyizwe mu bitaro biherereye mu bice by'iki gihugu 10 mu gihe ibindi bice 16 nta Covid-19 iharangwa.

Majaliwa yavuze ko umubare w’abandura muri iki gihugu wagabanutse, anasaba abanya-Tanzania gukomeza kubahiriza ingamba zabafasha kwirinda Covid-19.

Aya makuru aje nyuma y’igihe gito Perezida John Pombe Magufuri atangaje ko icyorezo cya Coronavirus cyashize muri Tanzania kubera ubuntu bw’Imana.

N’ubwo ubuyobozi bwa Tanzania bukomeza gushimangira ko Coronavirus isa n’iyamaze guhashywa muri iki gihugu, Ambasade ya Amerika yo ikomeza kuvuga ko iki gihugu cyugarijwe ndetse igashimangira ko ibyago byo kuhandurira biri hejuru cyane.