Sonko w’imyaka 49, ni we wari uzwi cyane muri Sénégal nk’utavuga rumwe na Leta, ndetse yari akunzwe n’urubyiruko rwinshi rw’icyo gihugu, dore ko yaje ku mwanya wa kabiri mu matora ya Perezida yabaye mu 2019.

No mu matora yo ku wa 24 Werurwe 2024, byari biteganyijwe ko Sonko ari we wari guhagararira ishyaka PASTEF nk’umukandida mu matora ariko yaje kwangirwa kwiyamamaza nyuma y’uko yakatiwe igifungo cy’imyaka ibiri mu 2023, azira guteza imvururu mu rubyiruko, ari bwo yahise agena Diomaye Faye kuzamuhagararira mu matora

Ishyaka PASTEF ryashinzwe mu 2014 ritangijwe na Sonko gusa yahise yiyambaza inshuti ye Diomaye Faye ngo amufashe kuriha umurongo w’ibitekerezo ndetse ahita amugira Umunyabanga Mukuru waryo, ari na byo byatumye ari we ahita agena ngo amusimbure ku rupapuro w’itora mu matora y’umukuru w’igihugu.

Mu bikorwa byo kwiyamamaza bya Faye, Sonko yaramufashije cyane aho yari afite intero igira iti “Diomaye ni Sonko”, asaba abari bamushyigikiye kuzatora Faye, waje no gutsinda amatora ku majwi 54%.

Nyuma yo kugirwa Minisitiri w’Intebe Sonko yahise avuga ko afite urutonde rw’abaminisitiri yifuza ko binjira muri Guverinoma agomba guhita ashyikiriza Perezida Faye kugira ngo babe bakemezwa.

Yanongeyeho ko atazayoborera muri Faye, ati “Nta kibazo kibazaho mu kumuha rugari kugira ngo we ubwe akore izi nshingano ziremereye yatorewe.”

Perezida mushya wa Sénégal, Bassirou Diomaye Faye, yahise agira Ousmane Sonko Minisitiri w'Intebe

Sonko w’imyaka 49, ni we wari uzwi cyane muri Sénégal nk’utavuga rumwe na Leta

Mu bikorwa byo kwiyamamaza hari intero ivuga ko "Diomaye ni Sonko"