Perezida wa Uganda Yoweri Museveni ubarirwa mu bayobozi barambye ku butegetsi muri Afurika, unateganya kwiyamamaza mu matora ya 2016, yibukije abaturage ba Uganda ko ari amahirwe bagize kuyoborwa nawe imyaka 28.

Inkuru ya RFI, ivuga ko uyu mukambwe w’imyaka 70 yavugiye ibi mu nama yagiranye n’abayobozi b’inzego z’ibanze ku wa gatanu tariki ya 28 Ugushyingo 2014, yageragezaga guhuza abayoboke b’ishyaka rya NRM, bacitsemo ibice bacyumva ko perezida Museveni ashaka indi manda.

Agerageza guhuza imyumvire y’abarwanashyaka ba NRM batavuga rumwe ku kuba Museveni yakongera kuyobora Uganda, yababwiye ko asanga Uganda yaragize amahirwe kuba imufite nk’umuyobozi wayo.

Ati “Uganda ifite amahirwe yo kungira. Ntibyumvikana kuba hari uwabishidikanyaho, nta nuwagira icyo anenga ku bumwe twabashije kwiyubakiraho.”

Yibukije kandi abashaka kumukoma mu nkokora muri gahunda yo kuguma ku butegetsi, ko ari umurwanyi utarapfushije ubusa igihe yamaze mu ishyamba.

Uyu mugabo ushaka kuguma ku butegetsi, twabibutsa ko akijya ku butegetsi nyuma yo guhirika ubutegetsi bw’igitugu bwa Milton Obote, yavuze ko atemeranya n’abayobozi b’abanyafurika banga kurekura ubutegetsi.

Kuri ubu Museveni ahanganye na Amama Mbabazi wahoze ari minisitiri w’intebe akirukanwa muri Nzeri y’uyu mwaka wa 2014.

Hari hashize iminsi anavanwe ku mwanya w’umunyamabanga mukuru w’ishyaka NRM, bikaba byaravuzwe ko azize kudashyigikira Museveni mu mugambi wo kwiyamamaza. Amama Mbabazi avuga ko azitabira inama y’ishyaka iteganijwe mu Kuboza.