Kuwa 31 Werurwe 2015 ni bwo inkuru yabaye kimomo ko Goodluck Jonathan wari usanzwe ari Perezida wa Nigeria atsinzwe amatora, bityo Gen. Muhammadu Buhari bari bahanganye akaba ari we wegukanye umwanya w’umukuru w’igihugu. Ese Buhari ni muntu ki?

Perezida Buhari ni we wa mbere utavuga rumwe n’ubutegetsi ubashije gutsinda uwari ku butegetsi. Ku nshuro ya kane yiyamamariza kuba umukuru w’igihugu, yagize amahirwe yo gutoranywa ngo ahagararire ihuriro ry’amashyaka atavuga rumwe n’ubutegetsi (All progressives Congress, APC).

Iri huriro ryahigitse ishyaka ry’ukwishyira ukizana kw’abaturage (PDP) Jonathan Goodluck akomokamo, ryari ryarigaruriye ubutegetsi nyuma y’ubuyobozi bw’igisirikare bwarangiye mu 1999.

Bimwe mu byo wamenya kuri Perezida Buhari

1. Ni umuyisilamu ukomoka mu majyaruguru ya Nigeria

Muhammadu Buhari yavutse kuwa 17 Ukuboza 1942 i Daura muri Leta ya Katsina iherereye mu majyaruguru ya Nigeria hafi n’umupaka w’igihugu cya Tchad.

Ni umuhererezi mu muryango w’abana 23, yashatse abagore babiri, abyara abana 10, yatanzweho umukandida n’ihuriro ry’amashyaka atavuga rumwe n’ubutegetsi ryitwa All Peoples Congress (APC).

Mu 2011, mu biganiro byashyigikiraga kubahiriza amategeko ya kiyisilamu mu gihugu hose, Buhari yavugiye mu ruhame ko Imana nibishaka bazaharanira ko amahame ya kiyisilamu yubahirizwa muri Nigeria.

Icyakora muri Mutarama 2015 yiyamamariza kuyobora igihugu, yongeye kumvikana avuga ko ashyigikiye ubwisanzure mu gusenga, ahamagarira buri wese kudahatira abantu kubahiriza amahame ya Kiyisilamu nk’uko byabaye mu 1983 na 1985.

2. Yabaye umusirikare anakiyobora imyaka 20

Ku myaka 19 Mahammadu Buhari yagiye mu gisirikare, mu 1980 aba umusirikare mukuru mu ngabo za Nigeria. Ukwamamara kwe kwiyongereye ubwo yagiraga uruhare mu ihirikwa ry’ubutegetsi ryakozwe na Lt.Col (Lieutenant-colonel) Murtala Muhammed akuraho ubutegetsi bwa Aguiyi Ironsi.

Mu 1983, Perezida Buhari yafashe ubutegetsi ahiritse Perezida Shehu Shagri watowe mu 1979. Ubutegetsi bwe ntibwarambye kuko mu 1985 yakuweho na Gen. (General) Ibrahim Babangida.

Mu mezi 20 yayoboye, yaranzwe no gufunga abantu benshi, barimo umunyamuzika Fela Kuti wavumbuye injyana ya Afrobeat, anahonyora uburenganzira bwa muntu.

Gushimuta abo batavuga rumwe, ibihano bikakaye, nk’aho ku butegetsi bwe gufata abakopeye mu bizami bya Kaminuza byahanishwaga gufungwa imyaka 20, no gukererwa ku kazi bigahanishwa ibihano bibabaza umubiri.

3. Yiyamamarije kuba Perezida inshuro eshatu atsindwa

Mu 2014 Muhammadu Buhari yatanzweho umukandida n’ihuriro ry’amashyaka atavuga rumwe n’ubutegetsi muri Nigeria (APC), atsinze Atiku Abubakar bari bahanganye.

Mu 2003, Perezida Buhari yiyamamaje mu matora y’umukuru w’igihugu atsindwa na Olusegun Obasanjo, mu 2007 na 2011 ntiyabasha gutsinda Umaru Yar’Adua na Goodluck Jonathan.

Mu 2011 gutsindwa kwe kwakurikiwe n’imvururu zahitanye ubuzima bw’abantu muri Nigeria.

4. Kwiyunga n’uwahoze ari umukuru w’igihugu Olusegun Obasanjo

Mu 2003 Perezida Muhammadu Buhari yatsinzwe na Olusegun Obasanjo wo mu ishyaka rya PDP ari na ryo Jonathan Goodluck aturukamo.

Mu kwezi kwa Gashyantare 2015 ni bwo Obasanjo yitandukanyije na Goodluck, byahaye imbaraga Perezida Buhari mu kwiyamamaza kwe.

Kuwa 31 Werurwe 2015 ni bwo komisiyo y’amatora muri Nigeria yatangaje ko Perezida Muhammadu Buhari yatsinze amatora ahigitse uwari usanzwe ku ntebe Jonathan Goodluck.

Yatorewe manda y’imyaka 4, akaba yitezweho ibisubizo by’ibibazo by’ibitero bya Boko Haram byibasiye Nigeria cyane cyane ku butegetsi bwa Goodluck.