Perezida wa Gambia Yahya Jammeh arashinja ibihugu by’amahanga bikomeye kuba inyuma ya kudeta yari igiye kumukorerwa kuwa Kabiri w’iki cyumweru ikaburizwamo.

Mu ijoro ryo kuwa Gatatu rishyira kuwa Kane, Perezida Jammeh yatangarije kuri Radiyo na Televiziyo by’igihugu ko igitero cy’abaterabwoba ku ngoro y’Umukuru w’Igihugu wa Gambia cyafashijwe n’abaturuka muri Leta Zunze Ubumwe za Amerika, u Budage n’u Bwongereza, ariko yirinda gutangaza abo aribo.

Uyu Mukuru w’Igihugu yahamije ko imbunda zakoreshejwe zakorewe muri USA nk’uko tubikesha Jeune Afrique.

Perezida Jammeh yemeza ko igitero cyo kuwa Kabiri atari Kudeta yari igiye gukorwa n’igisirikare nk’uko ibitangazamakuru bimwe byagiye bibitangaza.

Mu butumwa bwe, yahamije ko abashaka ubutegetsi ku mbaraga batazabigeraho na rimwe.

Kuwa Kabiri abitwaje intwaro bagabye igitero ku ngoro y’Umukuru w’Igihugu, ariko Perezida Jammeh yari mu ruzinduko i Dubai. Abarinda Perezida babashije gupfubya kudeta yari igiye gukorwa.

Iki gitero Leta ya Gambia yatangaje ko cyari kiyobowe n’uwigeze kuba Kapiteni witwa Lamin Sanneh ariko nawe akaba yarakiguyemo.

Yahya Jammeh umaze ku butegetsi imyaka 20, abatavuga rumwe nawe kimwe n’imiryango iharanira uburenganzira bwa muntu bamushija ubutegetsi bw’igitugu, bukandagira abatavuga rumwe nawe, akaniga n’ubwisanzure bw’itangazamakuru. Uretse ibyo, banongeraho ko nta burenganzira buhari ku batinganyi.

[email protected]