Ishaka riri ku butegetsi muri Zambia, PF ryirukanye ku buyobozi bwaryo Perezida w’inzibacyuho w’icyo gihugu, Guy Scott ku wa gatanu.

Umwe mu bagize inama nkuru y’ishyaka rya PF Malozo Sichone yatangaje ko Scott yirukanywe ku buyobozi bwaryo kubera imyitwarire ihabanye n’amategeko arigenga no gushaka kuyahindura.

Guy Scott yatangiye kuyobora Zambia ku ya 29 Ukwakira, nyuma y’urupfu rwa Michael Sata, ariko ntashobora kwiyamamariza kuyobora igihugu mu matora yo ku ya 20 Mutarama 2015 kuko afite inkomoko mu mahanga.

Abarwanashyaka ba PF barega Scott gukoresha ibinyamakuru yiha isura nziza kurusha ishyaka ayoboye.

Impuguke mu bya politiki Lee Habasonda yabwiye Radiyo y’Abadage DW ko ibyo birego ari urwitwazo rwo kumuvana ku buyobozi bagashyiraho umwirabura .
Habasonda asanga gushaka uzasimbura Scott bigiye guteza umwiryane mu ishyaka PF .

Scott yirukanywe ku buyobozi nawe yari yarirukanye umunyamabanga mukuru waryo Edgar Lungu ku mwanya we ariko akaza kumusubizaho nyuma y’imyigaragaambyo y’abarwanashyaka mu mihanda ya Lusaka.