Polisi y’Afurika y’Epfo yatangaje ko yasoje iperereza ku rupfu rwa Patrick Karegeya wiciwe muri icyo gihugu ndetse ko n’abakekwaho kubigiramo uruhare yabamenye bityo dosiye yabo ikaba yagejejwe mu rukiko.

Patrick Karegeye yishwe tariki 31 Ukuboza 2013 muri Hoteli iherereye mu Mujyi wa Johannesburg.

Urubanza rujyanye na Patrick Karegeya ruramutse rutangiye rwaba rukurikiye urwa Kayumba Nyamwasa ruherutse gusomwa mu cyumweru gishize aho bane bahamijwe gushaka kwivugana Nyamwasa, babiri bagirwa abere barimo n’Umunyarwanda.

Inkuru ya RFI ivuga ko iperereza ryarangiye mu byumweru bishize hakaba hari hashize amezi umunani rikorwa.

Mu magambo make, Polisi y’Afurika y’Epfo yavuze ko yizeye ibyavuye mu iperereza.

Umwe mu bavugizi ba Polisi yagize ati “Icyo navuga n’uko twakoze ibishoboka byose. Ariko sinshaka kuvuga byinshi ku iperereza ryacu. Twizeye ireme ry’iperereza twakoze. Icyo dutegereje ni ukumenya ibyo Parike (Urukiko) ibitekerezaho bityo ikaduha amabwiriza».

Umuvugizi wa Parike nawe yemeje ko iyo dosiye yabagezeho ikaba yarashyikirijwe umushinjacyaha akaba ari kuyisuzuma areba ko ifatika bityo hakaba hatangwa impapuro mpuzamahanga zo guta muri yombi abakekwa.

Kanda hano usome inkuru y’urubanza rw’abarashe kuri Nyamwasa.

Hejuru ku ifoto: Polisi y’Afurika y’Epfo