Mu myigaragambyo yabereye i Nairobi ikozwe n’abayoboke ba Raila Odinga, uwo munyapolitiki yavuze ko imodoka yari imutwaye yarashweho kenshi mu murwa mukuru Nairobi.

Ku wa Gatanu yakusanyije abanyamakuru, abereka uburyo amasasu yatoboye imodoka ye.

Ati "Nta kwibeshya kwabayeho kuko icyo bari bagamije ni ukunyica. Ntabwo nkeka ko hari umupolisi wajya kurasa umunyapolitiki ashaka kumwica atahawe amabwiriza n’abamukuriye."

Odinga avuga ko n’izindi modoka ebyiri zari zimuherekeje zarashweho. Yasabye abanyamategeko be gutegura ikirego bakakigeza mu rukiko.

Odinga w’imyaka 78 yatangije imyigaragambyo ngaruka-cyumweru, igamije kwamagana ubutegetsi bwa Perezida William Ruto ashinja kwiba amatora ya 2022, ndetse no kutabasha guhangana n’ibibazo byugarije igihugu birimo ubwiyongere bukabije bw’ibiciro.

Iyo myigaragambyo ntiyemewe na Polisi, ari nayo mpamvu buri gihe iyo ikozwe, abayoboke be baratatanywa, bagaterwa imyuka iryana mu maso.

Raila Odinga yatangaje ko Polisi ya Kenya yari igiye kumuhitana