Leta ya Repubulika Iharanira Demokarasi ya Congo yatangaje ko yataye muri yombi abantu bayingayinga 100 barimo abahoze ari abarwanyi b’umutwe wa M23 n’ab’indi mitwe yitwaje intwaro nka Maï-Maï, RCD-KML, bashinjwa iyicwa ry’abantu basaga 26 i Beni mu Ntara ya Kivu y’Amajyaruguru mu Kwakira.

Umuvugizi wa Leta ya Congo yatangarije Radiyo Mpuzamahanga y’Abafaransa, RFI, ko abafashwe barimo Abagande, Abanyatanzaniya n’Abanyekongo.

Abanyekongo bafashwe barimo abarwanyi b’imitwe yitwaje intwaro nka Maï-Maï, na RCD-KML wa Mbusa Nyamwisi.

Bamwe mu bayoboye ingabo muri ako gace, bavugwaho ubufatanyacyaha muri ubwo bwicanyi. Sosiyete Sivili yo yanasabye ko bamwe muri bo bakweguzwa bagasimbuzwa abandi.

Kuwa 15 Ukwakira 2014, ni bwo ahantu habiri hatandukanye mu gace ka Beni hishwe abantu abaturage basaga 26 mu mirwano yamaze iminsi ibiri hagati y’igisirikare cya Repubulika Iharanira Demokarasi ya Congo n’abarwanyi batahise bamenyekana.

Umuvugizi w’Ingabo za Repubulika Iharanira Demokarasi ya Congo muri Kivu y’Amajyaruguru, Lt.Col. Olivier Hamuli, yari yabwiye Ibiro Ntaramakuru by’Abafaransa (AFP) ko iyo mirwano yabereye mu duce twa Ngadi na Kadowu mu karere ka Beni ho mu Ntara ya Kivu y’Amajyaruguru.

Yari yagize ati “ Imitwe yitwaje intwaro yishe abantu basaga 26, muri iki gitero cyagabwe mu ijoro, kigahera i Ngadi, mu Majyaruguru y’Umujyi wa Beni.”

Ingabo za FARDC zagaragaje ko igitero cya mbere cyagabwe ahagana mu masaha ya saa moya, ubwo abarwanyi binjiye mu mazu y’abaturage batangira kubica, muri iryo joro hakicwa abaturage 13, hagakomereka batandatu.

Mu ijoro ryakurikiyeho, mu gace ka Ngandi hishwe abandi 14 barimo abagore barindwi.

Sosiyete Sivili yo muri ako gace yemezaga ko icyo gitero cyagabwe n’umutwe wa ADF- Nalu utavuga rumwe n’ubutegetsi bwa Uganda, ufite ibirindiro muri Congo, gusa mu bafashwe nta murwanyi wo muri uwo mutwe utagaragaramo.