Iyo myigaragambyo yabaye mu duce dutandukanye tw’umurwa mukuru Kinshasa, yaje gutatanywa n’igipolisi n’igisirikare, hifashishwa ibyuka biryana mu maso n’amasasu asanzwe, bamwe mu bigaragambyaga bahasiga ubuzima.

Imibare y’ibanze yatangazwaga ko ari abakirisitu batatu bishwe, gusa Intunmwa z’Umuryango w’Abibumbye ziri kugarura amahoro muri RDC, Monusco, zaje kwemeza ko abishwe ari abantu umunani.

Abateguye iyo myigaragambyo bamaganye imbaraga z’umurengera leta yashyize mu kubatatanya.

Umuvugizi w’igipolisi cya RDC, Colonel Pierrot Mwanamputu, yavuze ko hari “abasore babiri bapfuye bahanganye na Polisi ahitwa Matete,” ariko imiryango itegamiye kuri leta ivuga ko hari abantu benshi bapfuye abandi bagakomereka, abandi bagatabwa muri yombi barimo abapadiri.

Ubu harabarurwa abantu 87 batawe muri yombi mu murwa Mukuru Kinshasa, barimo abapadiri babiri. Naho mu bindi bice by’igihugu, abantu 41 bafashwe mu myigaragambyo yabaye kuri iki Cyumweru, nk’uko imibare y’agateganyo yatangajwe na Monusco ibivuga.

Perezida Kabila akomeje kwamaganwa n’abatavuga rumwe n’ubutegetsi bamusaba kuburekura. Kuwa 31 Ukuboza 2016 bageze ku masezerano yamwemereraga kuguma ku butegetsi, ariko hakazaba amatora bitarenze umwaka wa 2017.

Gusa komisiyo y’igihugu y’amatora yaje gutangaza ko amatora adashoboka, ahubwo itangaza ko azakorwa ku wa 23 Ukuboza 2018.