Kuri uyu wa Gatanu gusa, inzego z’ubuzima muri iki gihugu zavuze ko abantu 40 banduye iki cyorezo mu murwa mukuru Kinshasa. Kugeza ubu abantu 130 nibo bamaze gukira muri iki gihugu.

Inzego z’ubuzima muri iki gihugu zivuga ko kugeza ubu hari abandi bantu 261 barimo gukorwaho iperereza kuri iki cyorezo, naho abandi 680 bo ngo bari mu buzima bwiza.

Radio Okapi yavuze ko kuri uyu wa Gatanu hakozwe ibizamini 131 gusa.

Kugeza ubu Intara zirindwi nizo zugarijwe cyane na Coronavirus muri RDC, izi zirimo Kinshasa ifite abanduye 884, Congo yo hagati ifite abanduye 29, Katanga 10, muri Kivu ya Ruguru barindwi, Kivu y’Epfo bane, muri Ituri babiri naho muri Kwilu ni umwe.

Tariki 1 Werurwe uyu mwaka nibwo umurwayi wa mbere wa Coronavirus yagaragaye muri Repubulika Iharanira demokarasi ya Congo, ariko abandura bakomeje kwiyongera mu buryo bukomeye.

Abasesenguzi bavuga ko ibi biterwa n’uko kugeza ubu gupima abanduye Coronavirus muri iki gihugu bikiri hasi cyane.

Bavuga ko muri iki gihugu hari laboratwari imwe gusa ishobora gusesengura ibimenyetso bya Coronavirus, kandi nayo iri mu murwa mukuru Kinshasa.

Iyi laboratwari nayo ngo ishobora gufata gusa ibipimo 100 ku munsi, mu baturage bagera kuri miliyoni 80 batuye iki gihugu.

Abandura Coronavirus bakomeje kwiyongera muri RDC