Abasirikare batanu ba Repubulika Iharanira Demokarasi ya Congo bishwe n’inyeshyamaba za Lord’s Resistence Army (LRA) baguye mu mutego zabateze ahitwa Ngilima mu Majyaruguru y’intara y’Uburasirazuba.
Abatuye muri ako karere bavuze ko abo barwanyi babanje kwambura bamwe mu baturage ibyabo bakabatuma kubwira ingabo za Congo (FARDC) kwitegura kugabwaho ibitero.
Bakimara kugezwaho ayo makuru, abasirikare bari mu birindiro by’ahitwa Andwala berekeje ahari ibindiro bya bagenzi babo i Ngilima mu birometero 19 uturutse aho bari ngo babatize amaboko.
Radiyo Okapi itangaza ko mu gihe izo ngabo za FARDC zari mu nzira aribwo zaguwe gitumo n’inyeshyamba za LRA.
Umwe mu batanze ubuhamya yavuze ko abasirikare bane bahise bapfa ako kanya naho undi umwe akicwa n’ibikomere. Uyu mutangabuhamya kandi yavuze ko izo nyeshyamba za LRA zikimara kwica basirikare zambitse ubusa imirambo yabo zikayitwika.
Lord’s Resistence Army ni inyeshyamba ziyobowe na Joseph Kony urwanya ubutegetsi bwa Uganda zirukanywe ku butaka bwaho zihungira mu mashyamba ya Congo. Ureste abaturage ba RDC, izi nyeshyamba zikunze kugaba ibitero ku baturage ba Repubulika ya Centrafrique na Sudani y’Epfo.
LRA yashyizwe ku rutonde rw’imitwe y’iterabwoba na Leta Zunze Ubumwe za Amerika.
TANGA IGITEKEREZO