Umuryango w’Abanyamerika witwa Kivu Security Tracker (KST) wabanje gutangaza ko abapfuye bagera kuri 40 ariko imibare yari itaramenyekana neza.

Kivu Security Tracker yatangaje ko abagabye igitero baturutse mu mutwe w’inyeshyamba zitwa CODECO zishinjwa ubwicanyi bushingiye ku moko nk’uko tubikesha France24.

Akarere ka Djugu gahana imbibi na Uganda hafi y’Ikiyaga cya Albert, ni indiri y’amakimbirane n’ubwicanyi hagati y’ubwoko bw’aba Lendu n’na Hema.

Imirwano hagati y’aya moko yagize ubukana hagati ya 1999 na 2003 bikaba bibarwa ko imaze kugwamo abantu ibihumbi.

Imirwano yongeye kubura mu 2017 ubwo umutwe witwaje intwaro wa CODECO (Cooperative for the Development of the Congo: CODECO) uvuga ko urwanirira aba Lendu wavukaga.

Guhera icyo gihe, ibitero CODECO yagabye byahitanye ubuzima bw’amagana ndetse abasaga miliyoni 1,5 bavuye mu byabo naho kimwe cya kabiri cy’abaturage bo muri ako gace bugarijwe n’inzara n’umutekano muke nk’uko byavuzwe n’umuryango ukomoka muri Danemark urengera impunzi.

Hagati y’Ugushyingo n’Ukuboza umwaka ushize habaye ibitero byaguyemo 123 nk’uko KST yabitangaje.

Ibyo kuri uyu wa Kabiri byagabwe hagati ya saa tatu na saa yine z’ijoro. Mu bapfuye hagwiriyemo abana n’abagore bicishijwe imipanga. Abagabye igitero bbiraye mu baturage mu ibanga naho igisirikare cyatabaye nyuma y’igihe kirekire, ni ukuvuga mu gitondo cyo kuri uyu wa Gatatu nk’uko ibitangazamakuru bitandukanye byabivuze.

Intara ya Ituri n’iya Kivu y’Amajyaruguru zashyizwe mu bihe bidasanzwe umwaka ushize ndetse zihabwa abayobozi ba gisirikare na polisi.

Uretse ibitero bya CODECO, aka karere kibasiwe n’inyeshyamba za ADF umwe mu ifite ubukana mu igera ku 122 ibarizwa mu Burasirazuba bwa Repubulka Iharanira Demokarasi ya Congo.