Amakuru aturuka mu nzego za hafi z’ubutumwa bw’amahoro bw’Umuryango w’Abibumbye muri Repubulika Iharanira Demokarasi ya Congo, avuga ko Kakule Muhima uzwi cyane nka Koloneri Shetani (kol Shitani umuntu abishyize mu kinyarwanda) wari ukuriye umutwe w’inyeshyamba muri Kivu y’Amajyaruguru ubu ari mu maboko ya MONUSCO kuva kuri uyu wa mbere tariki ya 23 Ukuboza 2013.

Aya makuru ataremezwa na Leta avuga ko Muhima yafatiwe ahitwa Kiwanja.

Uyu ni Umukoloneri w’Umuhunde wabyihaye nk’uko ikinyamakuru jeuneafrique dukesha iyi nkuru ibivuga. Yari akuriye umutwe w’ubwirinzi ukorera mu Ntara ya Kivu y’Amajyaruguru ayoboye umutwe w’Aba mai-mai "Force populaire pour la démocratie (FPD)" bivugwa ko wamenyekanye ko utumvikanaga n’inyeshyamba za M23 zarwanyaga leta ya Congo

Nyuma Y’uko M23 itsinzwe leta ya Congo yakomeje kuvuga ko inyeshyamba zose ziri mu burasirazuba bw’iki gihugu zaba izo muri iki gihugu cyangwa izo hanze yashyira intwaro hasi.

Yari yiyunze n’ingabo za Congo. Impuguke za Loni zivuga ko "Shetani" yafashaga ingabo z’igihugu guhangana na M23 icyakora ubu izo nyeshyamba zatsinzwe akaba yari yaracecetse.

Yashinjwe ko mu mezi ya vuba ashize yaba yarayoboye ibitero byahitanye abasivili benshi mu Majyaruguru ya Kivu. Abarwanyi be bafatanya kandi n’umutwe witwa APCLS (l’Alliance des patriotes pour un Congo libre et souverain), umwe mu mitwe y’inyeshyamba zihagaze neza muri Kivu y’Amajyaruguru.

Mu ntangiriro z’uku kwezi izi nyeshyamba zashinjwe gusahura ingo z’abasivili i Kiwanja na Rutshuru higeze kuba kugenzurwa na M23.

Jeuneafrique kivuga ko cyavuganye n’abayobozi ba Congo i Kinshasa ntibagire icyo batangaza ku ifatwa ry’uyu muyobozi w’umutwe w’Aba maï-maï. Ngo cyanashatse kuvugana na Col Olivier Amri uvugira ingabo za Congo muri Kivu y’Amajyaruguru ntiyabasha kumubona. Iki kinyamakuru kivuga ko Loni ivuga ko yasanze byihutirwa gushyira col Shetani n’ingabo ze mu buryo bubabuza kuba bagira uwo babangamira.