RDC: Fayulu utemera intsinzi ya Perezida Tshisekedi yitabaje AU

Yanditswe na Mukaneza M.Ange
Kuya 12 Gashyantare 2019 saa 09:09
Yasuwe :
0 0

Martin Fayulu watsinzwe amatora ya Perezida wa Repubulika Iharanira Demokarasi ya Congo, RDC, ahigitswe na Félix Tshisekedi, yitabaje Umuryango wa Afurika Yunze Ubumwe, AU, kugira ngo umufashe gusuzuma ukuri ku byavuye mu matora.

Kuva ibyavuye mu matora yabaye ku wa 30 Ukuboza 2018 byatangazwa, Fayulu ntiyahwemye kugaragaza ko habayemo uburiganya kuko ahamya ko ariwe watsinze.

Jeune Afrique yanditse ko nyuma yo kwifashisha uburyo butandukanye ariko ijwi rye ntiryumvikane, Fayulu yitabaje AU ayisaba gushyiraho komisiyo idasanzwe izongera igasuzuma ibyavuye mu matora.

Mu ibaruwa yanditse tariki ya 8 Gashyantare, Fayulu yagaragaje kandi icyifuzo cy’uko amatora arimo aya perezida, abagize Inteko Ishinga Amategeko yasubirwamo bitarenze amezi atandatu.

Nubwo AU iherutse kugira Tshisekedi Visi Perezida wa kabiri w’uyu Muryango igikorwa cyabaye tariki ya 10 Gashyantare mu Nteko rusange ya 32 yari iteraniye Addis Ababa muri Ethiopie, Fayulu ahamya neza ko babizi ko atariwe watowe.

Yatanze umuburo w’uko mu gihe ibyo asaba byaba bidakozwe, Abanye-Congo batazongera kwizera ibirebana n’amatora kandi uku kwaba ari ugutsindwa kwa demokarasi.

Umunyabanga Mukuru wungirije w’ishyaka UDPS rya Tshisekedi, Rubens Mikindo we ahamya ko ibyo Fayulu asaba bidashoboka kandi yagakwiye kureka gukomeza guta umwanya dore ko yananiwe kwerekana ibimyenyetso bishimangira intsinzi avuga ko yegukanye.

Fayulu wari watanze ikirego mu Rukiko rurengera Itegeko Nshinga ariko kigateshwa agaciro, yandikiye AU mu gihe yari aherutse no kwitabaza Urukiko rwa Afurika rw’uburenganzira bwa muntu.

Fayulu yandikiye AU ayisaba gushyiraho itsinda risuzuma ukuri ku byavuye mu matora

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza