Umutwe wa FDLR urashinjwa kwica Abanyekongo 13 no gufata ku ngufu abagore benshi mu ntara ya Walikale hagati yo ku wa 3 no ku wa 5 Ugushyingo 2014, ugasabirwa kurwanywa byihuse.

Radio Okapi dukesha iyi nkuru yatangaje ko ibi bikorwa bya kinyamaswa bishinjwa FDLR byakozwe mu duce twa Misau na Misoke.

Umuyobozi w’umuryango utagengwa na leta muri Repubulika Iharanira Demokarasi ya Congo witwa Creddho, Aise Kanendu watangaje aya makuru, yari yasabye ko Abanyekongo barindwa abagize uyu mutwe mbere na nyuma yo kumenya aho bari kubahiga.

Kanendu yasabye ko ingabo za Congo, FARDC n’abazifasha bakora ibishoboka byose bakarinda abasivile bakomeza kwivuganwa na FDLR mu gace yigaruriye.

Yakomeje avuga ko ibikorwa byo kurwanya uyu mutwe byakorwa mbere y’itariki yatangajwe hagamijwe kurinda abanyekongo amakuba n’umubabaro bakomeje guterwa na FDLR.

Muri iri tangazo, uyu muryango washyize ahagaragara tariki ya 5 Ukwakira 2014, i New York, uyu muyobozi yasabye guverinoma ya Congo na Monusco ko yakwitegura kugaba ibitero ku bayobozi n’abagize FDLR idakozwa ibyo gushyira intwaro hasi, ahubwo ikarazwa ishinga no guhungabanya uburenganzira bw’ikiremwa muntu.

Umuryango wa CIRGL na SADC wafashe tariki ya 2 Mutarama 2015 nk’umunsi ntarengwa wo gutangira guhangana n’umutwe wa FDLR igihe cyose utarashyira intwaro hasi.