Iki gico cyatezwe kuwa 6 Mata 2015 muri pariki ya Virunga, maze abo barwanyi ba FDLR barasa ibisasu bibiri byo mu bwoko bwa “roquettes” ku modoka yari itwaye abo basirikare, 3 bahita bapfa abandi 9 barakomereka, umwe avamo ari muzima nk’uko Radio Okapi ibitangaza.

Abo basirikare baguye muri icyo gitero bari bagiye i Karenga, mu kigo cya gisirikare cya Kamoronza, aho bari bagiye kureba abarwanyi ba FDLR basaga 20 bari baraye bafashwe mpiri n’ingabo za FARDC.

Ubwo bari bageze ahitwa Mugando, ni bwo abantu bitwaje intwaro barashe ku modoka bari barimo, nyuma iza kongera kuraswaho ibindi bisasu bibiri, bihitana col. Raphael Bawili, umwe mu bayobozi b’ingabo za FARDC i Masisi, Lt.Col. ushinzwe ibikorwa bya gisirikare muri ako gace ndetse na Cpt. umwe.

Abarokotse icyo gitero batangaje ko babashije kumenya ko ababarasheho ari abarwanyi ba FDLR, bamwe bari bambaye imyenda ya gisivili abandi bambaye imyenda ishaje y’igisirikare cya Congo Kinshasa.

Imirambo y’abaguye muri icyo gitero yahise ijyanwa i Goma, mu gihe ubutabera bwa Gisirikare bwahise butangira iperereza.