Itsinda ry’intumwa z’Umuryango w’Ibihugu by’Akarere k’Ibiyaga Bigari (ICGLR) n’uw’Ibihugu bya Afurika y’Epfo (SADC) ku wa 6 Ukwakira zishimiye imiterere y’ ikigo cya gisirikare cyitiriwe Lt Gen. Bahuma gihereye I Kisangani kizakira abarwanyi ba FDLR bashyize intwaro hasi n’imiryango yabo.

Umujyanamana mu bya Politiki w’Ambasade y’Afurika y’Epfo muri Congo, Marius Conrad yabwiye Radio Okapi ko icyo kigo cyujuje ibisabwa byose ngo gicumbikire abo barwanyi ba FDLR.

Ati” Twasanze ikigo cyitiriwe Lt.Gen. Bahuma cyujuje ibisabwa byose, yego si nka hoteli, ariko kirimo ibyangombwa aba barwanyi ba FDLR n’imiryango yabo bazakenera […] igisigaye ni uko bacyerekezamo kandi ibikorwa byo gushyira intwaro hasi bigakomeza.

Iki kigo cya gisirikare cyitiriwe Lt Gen Bahuma kizoherezwamo abarwanyi ba FDLR, igihumbi na magana ane bari mu ntara za Kivu y’Amajyaruguru n’iy’Amajyepfo, bemeye gushyira intwaro hasi ku bushake n’imiryango yabo .

Muri Kanama , ingabo za Loni muri Congo(Monusco) zari zababajwe n’uko aba barwanyi banze kwerekeza iya Kisangani.

Abarwanyi ba FDLR bashyize intwaro hasi mu nkambi ya Kanyabayonga

Icyo gihe umukuru wa Monusco muri Kivu y’Amajyaruguru Ray Virgilio Torres yavuze ko ari ikimenyetso cy’uko FDLR idashaka guhagarika imirwano.

Nubwo hari abashyize intwaro hasi, igice kinini cy’abagize FDLR baracyafite intwaro kandi nta n’ubushake bwo kuzishyira hasi bagaragaza. Bavuga ko bazazishyira hasi ari uko bemerewe ibiganiro na Leta y’u Rwanda bakagaruka mu gihugu nk’umutwe wa politiki.

Mu cyumweru gishize, akanama k‘umutekano ka Loni kateye utwatsi ubwo busabe bw’ibiganiro kavuga k itariki ntarengwa yahawe FDLR nigera itarashyira intwrao hasi izagabwaho ibitero nta kabuza.