Umuvugizi w’Ingabo za RDC, Gen. Leon Richard Kasonga, yavuze ko mu gihe cy’amezi abiri, “abasirikare 60 baguye ku rugamba, muri gahunda yo kurwanya umutwe w’abarwanya leta ya Uganda (ADF) ukorera mu Burasirazuba hafi y’Umujyi wa Beni.” Yongeyeho ko abagera ku 175 bakomeretse.

Umutwe w’abarwanyi wa ADF urwanya ubutegetsi bwa Perezida wa Uganda, Yoweli Museveni, umwe mu bayobozi bayoboye igihe kirekire kuko yagiye ku butegetsi mu 1986.

Ni umutwe watangiye gukorera mu Burasirazuba bwa RDC mu 1995, kuri ubu ukaba ugizwe n’abarwanyi ugenda utoranya mu bihugu bitandukanye.

Umugaba Mukuru w’Ingabo za RDC, Gen. Celestin Mbala n’itsinda rye bakambitse mu Mujyi wa Beni kuva mu Ugushyingo.

Mu kwezi gushize ingabo za Congo zatangaje ko zananije abarwanyi 80 b’umutwe wa ADF barimo abasirikare bakuru bawo kuva ibitero byo kurwanya uwo mutwe bitangiye.

Umutwe wa ADF umaze igihe kigera ku myaka 25 mu bikorwa byo guhungabanya umutekano mu Burasirazuba bwa Congo, ugaba ibitero ku basivile n’inzego z’umutekano.Uwo mutwe ushinjwa kwica abasivile barenga 1000 kuva mu Ukwakira 2014.

Imiryango itari iya leta itangaza ko abarwanyi ba ADF bamaze kwica abaturage barenga 200 kuva ingabo za Congo zitangiye ibitero byo kuwurwanya ku itariki 30 Ukwakira.

Ingabo za Leta ya Congo zigera kuri 60 zimaze kugwa mu bikorwa byo kurandura imitwe yitwaje intwaro mu Burasirazuba bw'icyo gihugu