Inyeshyamba ziharanira ubwigenge bw’agace ka Ituri mu Majyaruguru y’u Burasirazuba bwa Repubulika Iharanira Demokarasi ya Congo (FRPI/ Force de Résistance Patriotique de l’Ituri de Cobra Matata) zivugwago kwica diregiteri w’ikigo giherereye ahitwa Rudjoko.

Nk’uko tubikesha Radio Okapi, Rudjoko ibarizwamo iki kigo iherereye mu birometero bigera kuri 45 ugana mu Majyepfo ya Bunia muri gace ka Ituri.

Izi nyeshyamba ngo zaba zarishe uyu muyobozi w’ikigo cy’amashuri abanza ku Cyumweru tariki 25 Gicurasi nyuma y’aho binavugwa ko mu cyumweru gishize zasambanyije abakecuru babiri babarirwa mu myaka 70 y’amavuko.

Iki gihe bivugwako ingabo z’izi nyeshyamba zasambanyije aba bakecuru ku ngufu ubwo zigabizaga ibyaro bitatu by’ahitwa Walendu Bindi, aho ngo zanatwitse inzu zigera kuri 57 zikanasahura amatungo y’abaturage.

Nk’uko bitangazwa n’abaturiye uduce twibasiriwe n’izi nyeshyamba, inyeshyamba Cobra de Matata zivugwaho gusahura imitungo itagira ingano y’abaturage.

Benshi mu batuye i Rudjoko bahunze ibyabo babitewe n’ibitero bikomeza kuvugwa ko ari ibya Cobra Matata.

Bivugwa kandi ko tariki 24 Gicurasi 2014, izindi nyeshyamba zitamenyekanye zateye ahitwa Chamlipa kamwe mu duce tw’i Walendu Bindi zitwika amazu abarira muri 12, zinatwara ihene 15.

Ubuyobozi bw’iki cyaro buvuga ko iki cyaro kimaze kugabwaho ibitero inshuro zigera ku 10 batabona ingabo za Congo (FARDC) ziza ku batabara.