Fayulu yari amaze igihe yarashyize mu rujijo abibazaga niba aziyamamaza cyangwa atazabikora. Kuri uyu wa 30 Nzeri yabwiye itangazamakuru ko ihuriro ry’amashyaka ryitwa Lamuka ari ryo ryamutoranyije ngo atange kandidatire ye mu matora y’umukuru w’igihugu.

Uyu munyepolitiki agiye guhatana na Perezida Félix Tshisekedi uri ku butegetsi kuva muri Mutarama 2019. Amaze imyaka itanu avuga yariganyijwe mu matora yo mu 2028 kuko intsinzi yari iye.

Uhereye muri Nyakanga 2022, ishyaka rye, Ecidé (Engagement pour la citoyenneté et le développement), ribarizwa mu ihuriro Lamuka ryari ryamusabye gutanga kandidatire mu matora y’uyu mwaka.

Fayulu avuga ko muri miliyoni 43,9 biyandikishije kuri lisiti y’itora harimo abagera kuri miliyoni 10 ba baringa.

Ati “Ntabwo ibi bizakunda. Duhakanye uburiganya ubwo ari bwo bwose mu matora. Tuzakomeza guharanira ko amatora aba mu mucyo.”

Ishyaka rya Fayulu ntiryigeze ritanga umukandida mu matora y’abagize Inteko Ishinga Amategeko n’ayo ku rwego rw’Intara.

Martin Fayulu yavukiye i Kinshasa. Yabaye umuyobozi wa sosiyete y’Abanyamerika icuruza peteroli, ExxonMobil kuva mu 1984 kugeza mu 2003.

Yatangiye kwinjira muri politiki mu 1991 ubwo yihuzaga n’abaturutse mu turere n’imiryango itandukanye baharanira ko habaho demokarasi ishingiye ku mashyaka menshi.

Perezida Mobutu Sese Seko wa Zaire y’icyo gihe yemeye ko inama yiswe ’Sovereign National Conference’ ibera mu gihugu cye ariko atera utwatsi imyanzuro yayivuyemo
Fayulu ntiyabonye uko yinjira muri politiki mu buryo bwa nyabwo kugeza mu 2006.

Mu matora yo mu 2006 na 2011 yatowe nk’umwe mu bagize Inteko Ishinga Amategeko.

Félix Tshisekedi yatangajwe ko ari we watsinze amatora yabaye mu Ukuboza 2018 nubwo indorerezi zibwiraga ko Fayulu ari we watsinze. Ni ibintu Fayulu n’abamushyigikiye bavuze ko byateguwe na Tshisekedi afatanyije n’uwo yasimbuye ku butegetsi, Joseph Kabila.

Fayulu yamaganye ibyavuye mu matora mu rukiko rushinzwe kurengera itegeko nshinga ariko rumutera utwatsi.

Muri Nyakanga 2019 yahuriye i Lubumbashi n’abandi bo muri opozisiyo barimo uwahoze ari Guverineri w’Intara ya Katanga, Moïse Katumbi, uwahoze ari MInisitiri w’Intebe, Adolphe Muzito na Jean Pierre Bemba.Bagiranye ibiganiro ku hazaza ha opozisiyo na demokarasi muri RDC.