Mu ijoro ryo ku wa Gatandatu nibwo Urukiko rurinda Itegeko Nshinga muri RDC rwemeje bidasubirwaho ko Félix Tshisekedi ari we watsinze amatora ya Perezida, rutesha agaciro ikirego cyari cyatanzwe na Martin Fayulu.
SADC yari iherutse gusaba ko habaho kongera kubara amajwi kuko bizaha ukunyurwa abatsinzwe n’abatsinze, yahise isohora irindi tangazo ishimira Tshisekedi wemejwe nk’uwatsinze amatora yabaye ku wa 30 Ukuboza 2018.
Iri tangazo ryashyizweho umukono na Perezida wa Namibia, akaba ari nawe uyobora SADC, Dr Hage G. Geingob, aho yashimiye RDC kubera uburyo amatora yagenze neza nubwo hari imbogamizi zishingiye ku mutekano n’ibikoresho bidahagije.
Itangazo riragira riti “SADC irahamagarira Abanye-Congo kwemera ibyavuye mu matora, kurushaho kubaka demokarasi baharanira amahoro n’umutuzo nyuma y’amatora”.
Uyu muryango kandi wanasabye abandi bafatanyabikorwa kubaha ubusugire bwa RDC, bashyigikira perezida watowe kandi guhererekanya ubutegetsi bugakorwa mu mutuzo.
Abakuru b’ibihugu barimo Perezida Pierre Nkurunziza w’u Burundi na John Pombe Magufuli wa Tanzania nabo bashimiye Tshisekedi ku bw’intsinzi mu matora y’umukuru w’igihugu muri RDC.
Perezida Magufuli yagize ati “Mu gihe dushimira Abanye-Congo, Ndabasaba gukomeza gusigasira amahoro kandi mbizeza kuzakomeza guteza imbere umubano wa kivandimwe uri hagati yacu.”
Nubwo Tshisekedi yemejwe nk’uwatsinze ariko, Fayulu bari bahanganye yakomeje gutsimbarara ku kuba ari we watsinze ndetse ashyira hanze itangazo nka perezida watowe avuga ko ibyakozwe ari ugusuzugura abaturage bamutoye ku majwi 60%, Umuryango wa Afurika Yunze Ubumwe n’Umuryango Mpuzamahanga.
Kuri uyu wa Mbere muri Congo hategerejwe intumwa z’Umuryango wa Afurika Yunze Ubumwe ziyobowe na Perezida Paul Kagame zigamije kumvikanisha impande zitavuga rumwe.
Uwo muryango ku wa Kane wari wasabye RDC kuba ihagaritse gutangaza ibyavuye mu matora bya burundu, nyuma yo kubona ko ibyari byatangajwe na Komisiyo y’Amatora mbere byari biteye impungenge.
TANGA IGITEKEREZO