Umukuru w’inyeshyamba zirwanya ubutegetsi bwa Repubulika Iharanira Demokarasi ya Congo zo mu gace ka Ituri “Forces des Résistance Patriotique en Ituri (FRPI)” yishyize mu maboko y’ingabo za Leta ya Congo ari kumwe n’amagana y’indwanyi ze.

Umuvugizi wa guverinoma ya Congo, Rambert Mende, ku wa 11 Ugushyingo 2014, yatangarije ibitangazamakuru byo muri RDC, ko Banaloki Matata bakunze kwita Cobra Matata yishyize mu maboko y’ingabo za RDC ziri Ituri.

Yagize ati “Ndemeza ko Cobra Matata yishyize mu maboko ya FARDC muri Ituri. Yazanye n’ingabo zibarirwa mu magana. Haraza gukurikiza amabwiriza yagenwe bajyanwe mu nkambi batangire kwamburwa intwaro no gusubizwa mu buzima busanzwe “

Hari hashize imyaka Cobra Matata atangaza ko yashyize intwaro hasi ariko akisubiraho ku munota wa nyuma, gusa Lambert Mende aragaragaza ko ubu bidashoboka ko yakwisubiraho kuko ari mu maboko y’ingabo za Leta ya Congo kandi zamaze gufata ibikoresho n’intwaro ze.