Tariki 30 Nyakanga 2020, ahagana saa mbili z’ijoro nibwo uyu musirikare bikekwa ko yari yasinze, yarashe abaturage 14 barapfa naho abandi umunani barakomereka, mu gace ka Sange, mu mujyi wa Uvira uherereye mu Ntara ya Kivu y’Amajyepfo.

Nyuma yo gufatwa uyu musirikare yemeye icyaha cye avuga ko hari aho yahishe imyambaro ye n’imbunda mu gihuru.

Abinyujije ku rubuga rwe rwa Twitter ku wa Gatanu tariki ya 7 Kanama, Guverineri w’intara ya Kivu y’Amajyepfo, Théo Ngwabidje Kasi, yemeje aya makuru, avuga ko uyu musirikare yafatiwe i Nyangazi, hafi y’umujyi wa Bukavu, ubwo yari arimo ahunga. Guverineri yijeje abaturage ubutabera.

Uyu musirikare nyuma yo gushyikirizwa ingabo za FARDC i Nyangazi, akaba yahise ajyanwa i Bukavu ku mugoroba wo kuri uyu wa Gatanu.