Abaturage batuye mu murenge wa Busasamana, mu karere ka Rubavu ahegereye ikibaya cya Congo bishimiye umunara mushya wubatswe ku gasozi ka Munanira, mu kagari ka Gasiza kuko wagabanyije imiyoboro ya Congo Vodacom CD, yababuzaga gukoresha itumanaho ryo mu Rwanda.

Bamwe mu baturage batuye mu tugari twa Gacurabwenge, Kageshi na Rusura baganiriye n’umunyamakuru wa IGIHE batangaje ko mbere y’uko umunara wubakwa, imirongo y’itumanaho yabonekaga hake hashoboka ku buryo hari n’ababikaga telefoni aho kuzikoresha kuko babaga batari buzikoreshe kubera imbaraga z’iminara yo muri Congo.

Uwitwa Gasore Jean d’Amour yagize ati “ Hari n’igihe cyageraga nkibagirwa ko ntunze telefoni kuko nabaga maze igihe kirekire nyibitse.”

Mobutu Jean Damascene we ni umuyobozi w’umudugudu wa Busanganya mu kagari ka Gacurabwenge, atangaza ko hari n’igihe abayobozi bamukuriye bamuburaga kuri telefoni igihe yabaga ari mu rugo.

Mobutu ati “ Hari n’igihe twabaga dukenewe ku murenge badushaka kuri telefoni bakatubura kandi zicanye. Twabaga tubogamiwe cyane kuko hari byinshi byaducikaga.”

Aba baturage baracyafite impungenge z’uduce duke tukibonekamo Vodacom aho batuye. Iki ni ikibazo gisangiwe n’imirenge y’Akarere ka Rubavu ihana umupaka na Congo, bityo basaba ko iminara y’u Rwanda yakomeza kwiyongera kuko uyu umwe wubatse watanze icyizere cy’itumanaho mu Rwanda.

Nubwo uyu munara wubatswe n’ikigo cy’itumanaho MTN, Guverinoma y’u Rwanda ifite gahunda yo kongera iminara mu gihugu hose ku nkunga ya sosiyete ya “Korea Telecom Company” igiye kugeza umurongo wagutse w’itumanaho ku baturage mu gihugu ku kigero cya 95 %.

Minisiteri y’Urubyiruko n’Ikoranabuhanga mu Isakazabumenyi n’Itumanaho ishimangira ko mu mwaka wa 2018 imbogamizi ku itumanaho mu Rwanda zizaba zarakuweho n’uyu murongo wagutse “Broad band”.

Amasosiyete y’itumanaho agiye kujya agura serivisi na Korea Telecom Company izaba yarakwije iminara hirya no hino nk’uko Jean Philbert Nsengimana Minisitiri w’Urubyiruko n’Ikoranabuhanga mu isakazabumenyi n’itumanaho yabitangarije abanyamakuru.