{Abantu bane bari bafatiwe bugwate i Rutshuru mu Ntara ya Kivu y’Amajyaruguru ku wa Mbere w’icyumweru gihishize, barekuwe hatanzwe amadolari yAmerika4000 ku wa Gatanu.}

Amakuru dukesha Radio Okapi avuga ko izo ngwate zarekuwe nyuma y’amadolari 4000 yatanzwe na Leta, gusa kugeza ubu abari babashimuse ntibaramenyekana.

Umuyobozi w’Inteko y’Intara ya Kivu y’Amajyaruguru, Jules Hakizumwami, yamaganiye kure kiriya gikorwa kirimo kuba by’umwihariko mu Mujyi wa Goma na Rutshuru, akaba yaranavuze ko mu cyumweru gishize hashimuswe akana k’agahungu k’imyaka 3 kaza gusangwa ahitwa Minova.

Uyu muyobozi yahamagariye inzego zose z’ubuyobozi guhagurukira kiriya kibazo kugira ngo kibonerwe umuti mu maguru mashya gusa ikivugwa ni uko hagiye hafatwa abashimusi benshi muri Rutshuru kuva no hambere ariko inzego z’ubucamanza nta kintu zijya zibikoraho.