Maman Sidikou, Uhagarariye Umuryango wa Afurika Yunze Ubumwe (AU) muri Somalia yavuze ko abo basirikare bahitanywe n’imirwano yabaye kuwa 19 Mata mu majyepfo ya Somalia ahitwa Shabelle, hagati ya Lego na Balidoge.

Yagize ati "Ingabo zacu zagerageje kuhangana n’izi ntagondwa muri iyo mirwano twatakaje abasirikare 3 abandi barakomereka.’’

Aganira n’ibiro ntaramakuru by’Abafaransa AFP, Umuvugizi wa Al Shabaab Abdulaziz Abu Musab yavuze ko bishe abasirikare 5 bakanatwika imodoka za AMISOM.

Yongeyeho ko abapfuye bari Abarundi, ariko AU ntiratangaza ubwenegihugu bw’abo basirikare bishwe.

BBC yatangaje ko umwiyahuzi yagabye ikindi gitero ku modoka ya Loni muri Somalia, kigahitana abantu barindwi barimo bane mu bakozi bo mu ishami ryita ku bana UNICEF.

Iki gitero cyagabwe i Garowe umujyi mukuru w’intara ya Puntland nkuko byatangajwe na Polisi.

Umuyobozi wa Polisi Ahmed Abdullahi Samatar yatangaje ko umurambo umwe muri iyi ushobora kuba ari uw’uwaturukije iki gisasu.

Umutwe wa Al Shabab urwanya leta ya Somalia wigambye iki gitero . bamwe mu babonye iki gitero kiba bavuze ko hapfuye abantu 10 nyamara aya amakuru ntaremezwa.

UNICEF yatangaje ko uretse bane mu bakozi bayo bapfuye hari n’abandi bane bakomeretse cyane.

Uretse u Burundi, ibindi bihugu bifite ingabo muri AMISOM ni Djibouti, Ethiopia, Kenya na Uganda .

Al Shabaab irwanira kwigarurira ubutegetsi bwa Somalia, uyu mutwe kandi uhangana n’ibihugu byohereje ingabo zabyo muri Somalia cyane cyane mu baturanyi babo ba Kenya, ariko Sidikou yijeje ko bazakomeza guhangana na yo.

Ibitero bya Al Shabaab muri Somalia byagiye byibanda ahakorerwa ibikorwa bya Leta no guhungabanya abashinzwe umutekano.

Kuwa 19 Mata, Al Shabaab yarashe umunyamategeko Adan Haji Hussein Depite wa Puntland ya ruguru, kuwa 2 Mata Al-Shabab yivuganye abanyeshuri ba Garissa muri Kenya 150.

Al-Shabab yatangiye ibikorwa by’iterabwoba mu 2006, ikaba imaze kuguhungabanya amahoro hose mu karere iherereyemo.