Monitor dukesha iyi nkuru itangaza ko abo basirikare ba UPDF baguye mu gitero uwo mutwe w’intagondwa z’abayisilamu wagabye ku birindiro by’ingabo za Uganda, biri ahitwa Janaale mu birometero 90 mu majyepfo y’Iburasirazuba bw’Umurwamukuru Mogadishu
Lt Col Paddy Ankunda yatangaje ko imirambo y’abasirikare 10 muri abo 12 bagombaga kugezwa ku kibuga cy’indege cya gisirikare i Entebbe mu gitondo cy’uyu wa 3 Nzeri 2015.
Ati “Hapfuye abasirikare 12, icumi muri bo baragezwa ino muri iki gitondo abandi babiri bazaza nyuma. AMazina y’abapfuye nay o araza gutangazwa.”

Umusirikare mukuru mu bakomeretse ni Lt.David Etua Ondama, hamwe n’abandi batanu bo ku ipeti rya Serija (Sgt), ba Kaporali (Cpl) babiri, abandi ni ba Privates.

Ku ruhande rwa Al-Shabaab ho icyo gitero cyahitanye 46 abandi babiri bafatwa mpiri.

Abarwanyi ba Al-Shabab bagabye icyo gitero ku birindiro by’umutwe w’ingabo za Afurika yunze Ubumwe zibungabunga amahoro muri Somaliya (AMISOM) kuwa 2 Nzeri 2015, bahitana bivugwa ko ari 45 barimo aba Uganda 12 n’abandi ba Somalia.

Umuvugizi wungirije w’ingabo za Uganda, Maj Henry Obbo, yavuze ko amakuru yo kuza kugabwaho igitero yari yamenyekanye.

Ati “Twari dufite amakuru ko Al-Shabaab ishobora kuza gukoresha imodoka za gisirikare n’amabombe [...] aya makuru twayamenye ari mu rukerera cyane.’’

Abarwanyi ba Al-Shabaab ngo babanje kwivugana abasirikare bari ku burinzi mbere yo kwinjira mu kigo no gutangira kwica ingabo za AMISOM.

Nyuma y’igitero, Umuryango w’Abibumbye watanze ubutumwa, bugira buti: “Bitewe n’igitero kitari cyoroshye, AMISOM iracyagenzura umubare w’abapfuye n’abakomeretse.’’

Amisom yanyomoje amakuru avuga ko ibirindiro byayo biri mu maboko y’umutwe wa Al-Shabaab.

Ku itariki ya 17 Nzeri 2009, Al-Shabaab yagabye igitero kuri Amisom ihitana batandatu barimo Abarundi nka Maj.Juvenal Niyoyunguruza na Maj.Gen Nathan Mugisha.

Mu mwaka wa 2010, Al-Shabaab yagabye igitero kwa Perezida wa Somalia harinzwe n’ingabo za AMISOM, isubijwe inyuma, ariko isiga yishe abasirikare bane ba Uganda.

Ku itariki ya 25 Ukuboza 2014, ubwo ingabo za AMISOM zafataga ifunguro rya nimunsi, zatewe zititeguye ariko zibasha kwirwanaho maze Al-Shabaab isubira inyuma.