Itariki y’amatora y’Umukuru w’Igihugu yamenyekanye muri Sudani , ngo ariko ntibiramenyekana niba perezida uriho guhera muri 1989 azongera kwiyamamaza.

N’ubwo Sudani irimo umutekano muke, ntibyabujije Komisiyo y’Amatora kwemeza itariki amatora rusange y’Umukuru w’Igihugu azabera.
Amatora rusange yemejwe ko azaba kuwa gatatu tariki ya 2 Mata 2015.

Abatavuga rumwe n’ubutegetsi bafata ayo matora nk’aho ari itegeko ryahawe iyo komisiyo ngo ariko nta cyo bitwaye kuko itariki izagera amatora akaba.

Ntibiramenyekana niba Perezida wa Sudani Omar El - Bechir wageze ku butegetsi mu mwaka 1989 azongera akiyamariza kuyobora indi manda. Kugeza ubu yashyiriweho impapuro zo kumuta muri yombi n’Urukiko Mpuzamahanga Mpanabyaha kubera ibyaha byakorewe inyoko muntu muri Darfour.

Moukhtar Al-Assam, Umuyobozi wa Komisiyo y’Amatora muri Sudani yagize ati «Dutangaje itariki y’amatora yo mu mwaka wa 2015 nk’uko biteganywa n’Itegeko Nshinga». Yongeyeho ko bifuza amatora aciye mu mucyo atabogamye kandi ko indorerezi zaba iz’imbere mu gihugu cyangwa hanze yacyo zose zihawe ikaze.

Yavuze ko itangazo ku baziyamamaza bazarimenyeshwa ku itariki ya 31 Ukuboza 2014 rikazakurikirwa n’ibikorwa byo kwiyamamaza bizatangira tariki ya 13 Gashyantare bikazageza tariki ya 30 Werurwe 2014.

Hejuru ku ifoto: Perezida Omar El Bechir