Ni nyuma yo gukusanya amajwi mu duce tumwe na tumwe twa Tanzania, mu matora ku mwanya w’umukuru w’igihugu n’abagize Inteko Ishinga Amategeko akomeje kuba muri iki gihugu, kuva tariki 25 Ukwakira 2015.

BBC ivuga ko iki ari ikibazo gikomereye cyane ishyaka riri ku butegetsi CCM, kuko nka Stephen M. Wasira, Minisitiri w’Ubuhinzi, ariko akaba yari anahagarariye agace ka Bunda mu Nteko Ishingamategeko, yatsinzwe kongera guhagararira ako gace na CCM mu Nteko.

BBC ikomeza ivuga ko hakiri kare kwemeza ko CCM izatsindwa aya matora, kuko hakiri amajwi yo mu duce tumwe na tumwe ataratangazwa.

Amatora yo kuwa 25 Ukwakira ni yo ya mbere mu mateka ya Tanzania abayemo guhangana bikomeye hagati y’impande zombi.

Minisitiri w’ubuhinzi, uw’ubuzima, uw’ishoramari n’uw’uburezi bari mu bamaze gutakaza imyanya bivuye ku matora yabaye kuri iki cyumweru.

CCM imaze imyaka 54 iyoboye igihugu cya Tanzania. Komisiyo y’amatora muri Tanzania ikazatangaza ibyavuye mu matora kuri uyu wa 29 ukwakira.