U Budage bwahaye EAC inkunga ya miliyoni 35 z’amadolari

00:00:00 IGIHE NETWORK

KINYARWANDA

ENGLISH

FRANCAIS

U Budage bwahaye EAC inkunga ya miliyoni 35 z’amadolari

Yanditswe na Bukuru JC

Kuya 9 November 2021 saa 12:20

Yasuwe :

Yavuzweho:

Umuryango wa Afurika y’Iburasirazuba (EAC) n’u Budage byashyize umukono ku masezerano y’imikoranire afite agaciro ka miliyoni 35 z’amadolari ya Amerika, azafasha mu bikorwa birimo kubaka ubushobozi mu by’imicungire y’amazi, kuzamura ubukungu n’ubuzima.

Aya masezerano yashyizweho umukono n’Umunyamabanga wa EAC, Peter Mathuki na Ambasaderi w’u Budage muri Tanzania, Regine Hess ku wa 8 Ugushyingo 2021.

Dr Mathuki yavuze ko iyi nkunga izafasha mu micungire no mu kubungabunga amazi y’ikiyaga cya Victoria ndetse no muri EAC muri rusange.

Ati “Iyi nkunga izagira uruhare runini mu iterambere ry’ibidukikije kuko uyu mutungo ukoreshwa mu nyungu z’abaturage.”

Amabasaderi w’u Budage muri Tanzania Regine Hess, yavuze ko hamwe no gushyiraho laboratwari z’icyitegererezo bizaha EAC ubushobozi kuba yiteguye guhangana n’ibyorezo n’ibindi bibazo by’umuzima bishobora kuyigwirira mu gihe kizaza.

Ati “Ibi bizatuma abaturage babasha kubona serivisi zo kwisuzumisha mu buryo bwagutse. Ibyorezo bishobora kwaduka bizamenyekana hakiri kare bishobore kurwanywa ku gihe.”

Amazi y’ikiyaga cya Victoria asaranganywa mu bihugu bigize EAC. Ambasaderi Regine yavuze ko kuzamura ubuziranenge bw’amazi bizajyana no guhindura ubuzima bw’abayakenera binyuze mu guhanga imirimo n’ibindi.