U Bufaransa bwohereje abasirikare bake i Diffa mu Majyepfo ya Niger ku mupaka wa Nigeria, bazafasha mu gutanga amakuru ku bihugu biri mu ntamabara yo kurwanya Boko Haram.

Igisirikare cy’u Bufaransa cyatangaje ko abo basirikare babarirwa hagati ya 15 na 20 bazaba bashinzwe gutanga amakuru i Ndjamena muri Tchad, ahari ibirindiro by’ingabo z’ibihugu byahagurukiye kurwanya Boko Haram nk’uko tubikesha RFI.

Ingabo za Chad zitabiriye urugamba rwo kurwanya Boko Haram

Uretse abo basirikare bazafasha mu gutanga amakuru, u Bufaransa bwiyemeje gutera inkunga abasirikare b’ibihugu by’ Afurika birwanya uyu mutwe w’iterabwoba butanga ibikomoka kuri peteroli n’intwaro.

Umutwe wa Boko Haram ni kimwe mu bibangamiye umutekano wa Nigeria, Ingabo za Tchad zibarirwa mu 2,500 n’iza Cameroun ziherutse kwica abarwanyi bawo 200 abarokotse bihorera bica abaturage 70 mu Mujyi wa Fotokol muri Cameroun.

Umuryango w’Afurika yunze Ubumwe wemeje ishingwa ry’umutwe w’ingabo wo kurandura Boko Haram 7500 ziturutse muri Nigeria, Chad , Cameroon, Niger na Benin. Bitegerejwe ko byemezwa n’Akanama ka Loni Gashinzwe Umutekano.

[email protected]