Ni mu kiganiro cyitabiriwe n’abarimo Umuvugizi wa Perezida Evariste Ndayishimiye, Rosine Guilène Gatoni, Umuvugizi wa Leta y’u Burundi, Prosper Ntahogwamiye na Agnès Bangiricenge, Umunyamabanga Mukuru akaba n’Umuvugizi w’Urukiko rw’Ikirenga.

Ikibazo kigaruka ku ifatwa n’ifungwa rya Bunyoni cyaje mu bya mbere, habazwa aho afungiwe ndetse niba umuryango we wari wemererwa kumubona.

Bangiricenge yagize ati "Afungiwe mu iperereza, ibyo ashinjwa, ashinjwa guhungabanya umutekano w’igihugu, ashinjwa kandi guhungabanya ubutunzi bw’igihugu, ashinjwa kandi inyungu z’akazi zidaciye mu mategeko."

Icyakora, yavuze ko umuryango wa Bunyoni utaramubona.

Ati "Umuryango we ntabwo urashobora kumubona, ari ko vuba azaba afite uburenganzira bwo kumubona."

Kuri iki cyumweru Ubushinjacyaha bukuru mu Burundi bwemeje ko bwataye muri yombi Gen Alain Guillaume Bunyoni wahoze ari Minisitiri w’Intebe wari umaze iminsi ashakishwa n’inzego z’umutekano.

Bunyoni yari amaze iminsi ashakishwa n’ubugenzacyaha ngo abazwe ku makuru akekwaho kuba afite ku byaha byakozwe. Ikirego cyatanzwe tariki 17 Mata 2023 ariko abashinzwe umutekano bagiye gusaka iwe baramubura.

Ubushinjacyaha mu itangazo bwashyize hanze kuri iki Cyumweru, bwavuze ko Bunyoni yafashwe kuwa Gatanu tariki 21 Mata 2023, afatirwa mu gace ka Nyamuzi mu Ntara ya Bujumbura aho yari yihishe.

Yahise atabwa muri yombi, afungiye muri kasho ya polisi nk’uko Leta y’u Burundi yabitangaje.

Ubushinjacyaha bwavuze ko bugikora iperereza ku byafatiwe mu rugo rwa Bunyoni, nyuma akaba aribwo hazamenyekana ibya dosiye ye.

Ku wa Gatandatu Komisiyo ishinzwe uburenganzira bwa muntu mu Burundi, yatangaje ko yamusuye muri kasho kandi yasanze ameze neza, nta totezwa yakorewe.