Ibi byatangajwe na Prosper Bazombanza, Visi Perezida w’u Burundi, uvuga ko mu rwego rwo kugarura ituze mu gihugu, bashaka gufungura abasore n’inkumi bafatiwe mu myigaragambyo imaze icyumweru muri icyo gihugu.

Bazombanza yabitangaje afungura ku mugaragaro inama y’iminsi ibiri ibahuje n’abatavuga rumwe n’ubutegetsi, imiryango itegamiye kuri Leta n’abahagarariye amadini.

Ikindi Leta isezeranya abari mu myigaragambyo ngo ni ugukuraho impapuro zo guta muri yombi bamwe mu bari mu miryango yigenga hamwe no gufungura amaradiyo yari yarafunzwe ashinjwa gutangaza inkuru Leta ivuga ko zihamagarira abenegihugu kujya mu mihanda.

Ibi Leta yabisezeranyije abigaragambya, ariko ngo bizakorwa ari uko abari mu mihanda na bo biyemeje kuyivamo haba mu murwa mukuru Bujumbura no mu bindi bice by’igihugu.

Ibiro ntaramakuru by’Abafaransa dukesha iyi nkuru biratangaza ko kuva iyi myigaragambyo yatangira hamaze gutabwa muri yombi abagera kuri 600, ku isonga hakaba hari Vital Nshimirimana wo muri sosiyete sivile mu Burundi, washyiriweho impapuro zimuhagarika ariko akaba atari yafatwa.

Iyi myigaragambyo yatangiye kuwa 26 Mata 2015, ubwo CNDD FDD, ishyaka riri ku butegetsi, ryemezaga Perezida Nkurunziza nk’umukandida uzarihagararira mu matora y’umukuru w’igihugu ateganijwe muri Kamena uyu mwaka.

@samkwizera28