Imibare yatangajwe na Gen Jeje Odongo mu biganiro ku mushinga w’itegeko rijyanye no gutunga intwaro nto kuwa Gatanu ubwo yari i Entebbe, igaragaza ko abantu 503 bishwe barashwe hagati ya 2014 na 2016, mu gihe abandi bagera ku 1,477 barokotse ariko bari barashwe bagakomereka ku buryo bukomeye.
Ubu bwicanyi ni ingaruka z’itungwa ry’imbunda mu buryo bunyuranije n’amategeko rikomeje gufata indi ntera.

Gen Odongo yabwiye abadepite bo muri Komisiyo y’Umutekano n’Ububanyi n’Amahanga, bari kwiga kuri uyu mushinga w’itegeko ndetse n’abandi bafatanyabikorwa; ko mu 2014 abantu 181 bishwe barashwe, mu 2015 hapfuye abantu 151 naho mu mwaka ushize bagera ku 171.

Gen Odongo yavuze ko iyi mibare ihangayikishije cyane inagaragaza ko ari ikibazo gikwiye kuvugwa.

Muri Uganda, abasivili bizwi neza ko batunze imbunda ni 6000 naho 16,783 zikaba zitunzwe n’ibigo byigenga bishinzwe gucunga umutekano. Nta mibare igaragaza abantu bazitunze mu buryo bunyuranije n’amategeko iratangazwa kugeza ubu.

Imodoka Andrew Felix Kaweesi yarimo yasatiriwe n'abantu bari kuri moto bayirasaho, we n'abo bari kumwe bahita bapfa