Minisitiri w’uburinganire, umurimo n’iterambere ry’umuryango muri Uganda yasabye abagore kutiyima abagabo babo kuko bikurura ihohoterwa.

Mary Okurut Karooro yongeyeho ko hari aho usanga iri hohoterwa rikurura impfu hagati y’abashakanye.

Ati “ Byaravumbuwe ko abagore batacyubahiriza isezerano ryo guhsyingirwa . Guhakanira umugabo wawe gukora imibonano mpuzabitsina mu gihe nta kibazo ufite nk’uburwayi ni ukumubuza uburenganzira bwe.”

Izi nama Karooro yatangaga ku bagore bo mu gace ka Bushenyi-Ishaka, ahagarariye mu inteko ishinga amategeko ya Uganda.

The Monitor dukesha iyi nkuru yatangaje ko Minisitiri Karooro yabahaye urugero rw’umugabo wishe umugore we muri ako gace bitewe n’uko umugore yanze ko bakorana imibonano mpuzabitsina, bisa no kumuhakanira uburenganzira bwe.
Yavuze ko bibabaje kubona umugabo n’umugore bamaze imyaka isaga 20 bashakanye ariko bagipfa iki kintu.

Ati “Mumaze imyaka 20 mushakanye, kubera iki wamuhakanira gukora imibonano mpuzabitsina?

Yasabye abagabo batubahiriza inshingano zabo mu rugo nabo kwikubita agashyi.
Ati “abagabo bagomba kubahiriza inshingano zabo mu ngo, bagatunga imiryango yabo. Bikomereye umugore kubana n’umugabo utagize icyo amariye urugo.”

Polisi muri Uganda itangaza ko mu birego yakira ibyinshi biba ari iby’ihohoterwa ryo mu ngo n’irishingiye ku gitsina.

[email protected]