Itangazamakuru ryo muri Uganda riratungwa agatoki kwibasira Polisi, na ryo
rikayishinja kubangamira abanyamakuru mu kazi kabo.

Mu nama y’umuryango uharanira uburenganzira bw’abanyamakuru (Human Rights Network for Journalists), Martin Okoyo Umuyobozi wa Polisi mu Karere ka Gulu yatangaje ko Itangazamakuru rijya ribogama akenshi mu nkuru zirimo na Polisi.

Yagize ati: “Twitegereje twitonze uburyo itangazamakuru ritangaza inkuru ku bintu bireba Polisi. Ibinyoma hafi ya byose byitirirwa Polisi, cyane cyane iyo hari ukutumvikana kubayeho hagati ya Polisi n’Abanyamakuru.”

“Uburyo amakuru atangazwa burabogamye, kuko kuri ubu Abapolisi bibasirwa bikomeye, ariko Itangazamakuru rigatangaza amakuru atari yo, aho kuvuga ukuri, rigashinja Polisi.”

Umuhuzabikorwa w’Umuryango Uharanira Uburenganzira bw’Abanyamakuru (HRNJ) Robert Ssempala we ahakana ibitangazwa na Polisi, akavuga ko batabogama, kuko gutangaza ibyabayeho bakerekana n’amafoto ya byo, biri mu nshingano za bo.

Ati: “Ntabwo dutangaza ibinyoma, nta n’ubwo tubogamira ku ruhande urwo ari rwo rwose. Umwuga wacu ni uwo kubwira rubanda ibyabereye ahantu runaka. Ahubwo rimwe na rimwe Polisi ihutaza abanyamakuru iyo batara amakuru.”

Muri Kanama uyu mwaka HRNJ yari yagaragaje impungenge iterwa no kuba ishyikiriza Polisi ibirego by’abapolisi bahutaza abanyamakuru, ariko igatungurwa nuko uregwa ari na we uregerwa, ntihagire igikorwa.

Uyu muryango usaba ko habaho urwego rwigenga rukurikirana akarengane kakozwe na Polisi.

Muri Uganda, itangazamakuru na Polisi bakunze kugirana ibibazo, ndetse rimwe na rimwe abanyamakuru bakanafatwa bagafungwa by’igihe gito.

Muri Gicurasi 2011 ubwo Dr. Col. Kizza Besigye yatahukaga avuye kwivuriza muri Kenya, abanyamakuru barimo batara inkuru aho imbaga y’abamushyigikiye yamwakiriraga, bashyamiranye na Polisi, bamwe bamburwa ibikoresho, abandi barafatwa bashyikirizwa inkiko.