Kuwa Kane tariki 21 Mutarama, ubwo yatangaga ibimenyetso ku byaha 70 ashinjwa , Umushinjacyaha, Ben Gumpert, yabwiye ICC ko uyu Ongwen wahoze ari umuyobozi mu mutwe wa LRA ashobora gukurikiranwaho ibyaha by’intambara.

Umushinjacyaha yabwiye urukiko ko Ongwen afite uruhare runini muri ibi byaha, kubera ibitero bikaze byagiye bigabwa bigahitana abasivili, abandi bagakorerwa iyicarubozo ndetse abagore n’abana bagashimutwa.

Yagize ati “Abantu barishwe, barakomeretswa bikomeye, inzu ziratwikwa ariko ikirenze kuri ibyo, abantu barashimuswe karahava, abana binjizwa mu barwanyi, abagore n’abakobwa bafatwa ku ngufu.”

Yongeyeho ko kuba uyu mugabo w’imyaka 40 yaragiye mu gisirikare nawe ashimuswe ubwo yari afite imyaka 10 gusa, bitatuma urukiko rumufata mu buryo nyoroshyacyaha budasanzwe.

Aljazeera dukesha iyi nkuru, yavuze ko Ongwen akurikiranyweho ibyaha 70 birimo ubwicanyi, gusambanya ku gahato, iyicarubozo no gukoresha abana mu gisirikare, byose bigakomoka ku bitero byagabwe ku mpunzi muri Uganda mu mwaka wa 2003 na 2004 na we ubwe yagizemo uruhare.

Ongwen yatawe muri yombi muri Mutarama 2015, afashwe n’ingabo za Amerika mu cyaro cyo mu Majyepfo ya Centrafrique.

Uwahoze ari umurwanyi mu mutwe wa Lord Resistance Army muri Uganda, Dominic Ongwen