Ni ubutumwa yatanze kuri iki Cyumweru, mu ijambo yagejeje ku baturage ku buryo bwo kurushaho gukumira icyorezo cya Coronavirus.

Yagize ati "Ntihazagire umuntu n’umwe uzana muri Uganda imirambo y’abantu bapfuye bazize COVID-19. Umuntu wese uzicwa na COVID-19 ari hanze ya Uganda azashyingurwe aho, mushobora no guhitamo kumutwika, ariko ntihazagire umuntu uzana iyo mirambo hano."

Ni ubutumwa bwakiriwe mu buryo butandukanye, bamwe bashima uwo mwanzuro, abandi bibaza impamvu umwenegihugu yashyingurwa ishyanga, cyangwa uko byagenda muri ibi bihe, ku muturage waba yishwe n’indi ndwara.

Museveni aheruka gutangaza ko umuntu uzicwa na Coronavirus aguye mu gihugu, azashyingurwa na Leta, kugira ngo bikoranwe ubwitonzi nk’uko byagenze kuri Ebola.

Yavuze ko ari mu buryo bwo kwirinda ibiheruka kuba muri Afurika y’Iburengerazuba ubwo yari yugarijwe na Ebola, abantu bagakomera ku muco wabo wo koza imirambo, maze abitaga ku bapfuye nabo batangira gupfa bazize iyo ndwara.

Amabwiriza y’Ishami ry’Umuryango w’Abibumbye ryita ku Buzima, OMS yo muri Werurwe 2020, avuga ko uretse ku ndwara za Ebola na Marburg, imirambo y’abantu bishwe n’indwara zandura yo itanduza. Kugeza ubu ngo nta kimenyetso kigaragaza umuntu wanduye COVID-19 kubera ko yegereye umurambo w’umuntu yahitanye.

Itanga inama ko mbere yo kumukoraho ari ngombwa kwikingira hakoreshejwe ibikoresho byabigenewe.

Kugeza ubu muri Uganda hamaze kuboneka abantu 55 banduye Coronavirus, 28 bamaze gukira. Uganda kandi ikomeje gukurikirana abantu 316 bahuye n’abanduye.

Let no one bring any bodies of people that have died of COVID-19 to Uganda. Whoever dies of COVID-19 outside Uganda should be buried there, you can also choose to cremate them, but let no one bring the bodies here. #M7Address. pic.twitter.com/ryka4Bh1Xe

— Yoweri K Museveni (@KagutaMuseveni) April 19, 2020

Museveni yategetse ko nta muntu wishwe na Coronavirus uzinjizwa muri Uganda