Nyuma y’aho igisirikare cya Uganda cyemereye ko umusirikare ufite ipeti rya majoro kumanura ashobora gusaba gusezererwa akabyemererwa, abarenga ibihumbi 2 bahise batanga iki cyifuzo.

Amakuru ava mu gisirikare cy’iki gihugu, aravuga ko byibura abasirakare ibihumbi bibiri bamaze gutanga ubusabe ko bava muri uyu mwuga, Lt Col Paddy Ankunda Umuvugizi w’Igisirikare cya Uganda, akaba avuga ko ubu amategeko yose yumvikana ku shaka kuva muri iyi mirimo.

Lt. Col Ankunda aravuga ko ingabo zashyizeho amabwiriza mashya, ajyanye no kuva muri uyu mwuga, aho umusirikare ufite ipeti rya majoro kumanura ufite imyaka 50, ashobora kwemererwa kujya iwe ku bushake.

Redpepper kiravuga ko ibi nyamara bije nyuma yaho Gen. David Sejusa wahoze akora mu iperereza rya Uganda ubu wahungiye mu Bwongereza, atangarije ko Perezida Museveni atemera ko hari abasirikare bava mu ngabo atinya ko bashobora kujya mu mitwe imurwanya, aho avuga ko we yabigerageje inshuro nyinshi ariko akangirwa.

Lt Col. Ankunda yagize ati “Abarenga ibihumbi 2 basabye ko barekurwa, ariko ingengo y’imari ntiraboneka neza, uretse ko ushaka wese wujuje ibyangombwa, azemererwa.”

Uyu muyobozi avuga ko kubera uburyo aba basirikare ibihumbi bibiri bagiye kuva mu gisirikare, mu kwezi gutaha abarenga ibihumbi bitatu bazinjizwa kugira ngo iyi iki cyuho kiveho.

Hejuru ku ifoto:Lt Col Paddy Ankunda Umuvugizi w’Igisirikare cya Uganda