Ambasaderi w’ u Burundi mu muryango w’Ubumwe bwa Afurika, Alain Nyamitwe, yabwiye Radiyo Mpuzamahanga y’Abafaransa ko perezida wa komisiyo ya AU, Nkosazana Dlamini-Zuma, yemereye perezida Pierre Nkurunziza ubufasha yari yasabye ngo hamenyekane inkomoko y’imirambo yagaragaye mu kiyaga cya Rweru.

Ati "Mbere hari ikibazo cyo kumenya imiterere y’ ikibazo, ubu iki ni cyo gihe cyo kumenya aho ukuri guherereye, ntituramenya igihe abazakora iperereza bazahagerera ariko twamaze kubona inyandiko imenyesha ko bagiye kuza vuba.”

Nkosazana Dlamini-Zuma perezida wa Komisiyo y'Umuryango w'Ubumwe bwa Afurika

Leta y’u Burundi yavuze ko iyo mirambo basanze ishobora kuba iva mu Rwanda izanywe n’amazi y’Akagera, ariko Leta y’ U Rwanda na yo ihita ibyamaganira kure, ivuga ko nta muturage n’umwe wayo waburiwe irengero.

Imirambo ibarirwa muri 40 yabonetse mu bihe bitandukanye ihambiriye mu mifuka, indi yambaye ubusa, kugeza ubu inkomoko yayo ntiramenyekana.