Nyuma y’uko Leta ya Congo ifatiye umwanzuro wo kohereza inyeshyamba zo mu mutwe wa FDLR mu Ntara ya Equateur, aba ni abaherutse gushyira intwaro hasi, Senateri Jacques Djoli wo mu Nteko Ishinga Amategeko y’iki gihugu yateye utwatsi iki cyemezo, asaba leta kwisubiraho.

Byari bibaye ubugira kabiri abarwanyi ba FDLR bashyira intwaro hasi. Ubwa mbere hitanze abagera ku 105, naho abaheruka bari 83 ndetse n’imiryango yabo. Leta ya Congo ikaba yarafashe gahunda yo kubanza kubacumbikira mu bigo i Walikare, hanyuma ikazabohereza mu Ntara ya Equateur, aho bazaba bari mu gihe icyemezo cyo kubacyura mu Rwanda kizaba kitarafatwa.

Nk’uko byatangajwe na Eco243, Senateri Djoli yemeza ko gutuza aba barwanyi muri iyo ntara ari imibare mike, ndetse bisa nko kwicarira igisasu kiba kiraye kizaguturikana, kuko uyu mutwe ari imwe mu mitwe imaze imyaka 20 ijujubya abaturage ba Repubulika Iharanira Demokarasi ya Congo ndetse ukaba waratumye mu mubano w’u Rwanda na Congo hazamo agatotsi kazagorana kugasibanganya.

Djoli asanga ari nko gutera icumu abaturage mu mugongo

Senateri Djoli avuga ko kuba Leta ya Congo yemera guha icumbi aba barwanyi ku mugaragaro ni ugushinyagurira abaturage bayo idasize n’u Rwanda kuko bamwe mu bagize FDLR bakurikiranyweho gusiga bahekuye u Rwanda muri jenoside yakorewe abatutsi muri Mata 1994 igahitana abarenga miliyoni.

Tagize ati «Aya makuru yatugushije mu kantu. Natwe turabyamaganye twivuye inyuma. Ntibikwiriye ko Intara ya Equateur ihinduka ikimpoteri».

Yemeza ko bikwiriye kwitara neza mu kibazo cya FDLR, kugirango umubano wabo n’abaturanyi b’Abanyarwanda wongere kuba mwiza.

Ati «Tuzi neza ko ikibazo cya FDLR ari ingenzi cyane mu gusubiza ubuzima umubano wacu n’abaturanyi b’Abanyarwanda. Ariko ntitwakwemera gucumbikira izi nyeshyamba».

Senateri Djoli asanga uko Leta ya Congo iri kurwana no gucyura abahoze ari abarwanyi b’umutwe wa M23, ariko byagakwiriye no kuri FDLR, nabo bagataha mu rwababyaye.

Jacques Djoli ukomoka mu Ntara ya Equateur akaba ari na o ahagarariye mu Nteko Ishinga Amategeko ya Congo, yemeza ko kujyana abarwanyi ba FDLR i burengerazuba atari wo muti kuko naho ari muri Congo, bityo akemeza ko bakwiriye kuvanwa ku butaka bwa Congo bagataha mu Rwanda.

Ati «Ntabwo washakisha uko ukemura ikibazo cy’umutekano mucye iburasirazuba, ngo umuti ube kohereza umutekano mucye muri Equateur».

Hejuru ku ifoto: Jaques Djoli