Ishyirahamwe ry’Umuryango w’Abibumbye ryita ku Mpunzi (UNHCR), riravuga ko umubare w’impunzi rifasha wamaze kurenga miliyoni 46 mu gice cya mbere cy’umwaka ushize wa 2014, bika ari ubwa mbere bibayeho mu mateka.

Icyegeranyo UNHCR yashize ahabona kuri uyu wa gatatu, kirerekana ko uwo ariwo mubare wa mbere munini ubonetse mu gihe gito ugereranije n’iyindi myaka yabanje, kandi ngo igiteye impungenge ni uko uyu mubare ukomeje kugenda wiyongera.

Iri shami ry’Umuryango w’Abibumbye ryita ku Mpunzi, rigaragaza ko izi miliyoni 46 z’impunzi zabaruwe mu gice cya mbere cy’umwaka wa 2014, zirutaho miliyoni eshatu n’ibihumbi 400, imibare y’impunzi uyu muryango wfashaga mu mwaka wa 2013 wose.

Iki cyegeranyo kigaragaza ko mugihe imiryango mpuzamahanga ikomeje kubura ibisubizo bya politiki ku bibazo by’amakimbirane biriho no gukumira ibishobora kuvuka, Isi izakomeza kugorwa n’uruhurirane rw’ibibazo by’ubuhunzi bwibasiye abantu ku buryo bukomeye.

Iki cyegeranyo kandi cyegeka ibi bibazo byose ku ntambara zibera mu burasirazuba bwo hagati n’umugabane wa Afrika, ahakomeje kuboneka impunzi zitagira ingano, zihunga ibihugu byazo cyangwa uduce zituyemo mu bihugu buri munsi.

Urutonde rw’ibihugu bifite impunzi nyinshi zifashwa na UNHCR, rubimburiwe na leta ya Syria n’impunzi zisaga miliyoni eshatu, hafi 23% by’impunzi zose zifashwa na n’uyu muryango ku Isi. Afghanistan niyo iyigwa mu ntege n’impunzi zisaga miliyoni ebyiri n’ibihumbi 700.

Somaliya ifite impunzi zisaga miliyoni imwe, Sudan ifite impunzi 670,000, Sudani y’Epfo ifite impunzi 509,000, Repubulika Iharanira Demokarasi ya Congo ifite impunzi 493,000.

Ibindi bihugu bifite impunzi zifashwa na UNHCR birimo, Myanmar, Iraq, Pakistan, Lebanon, Iran, Turkey, Jordan, Ethiopia, Kenya na Chad.

UNHCR ivuga ko ikibabaje cyane ari uko hari ibihugu byaberewe umutwaro n’umubare w’impunzi bifite kurusha ibindi, bitewe n’amikoro make bisanganwe.