BBC dukesha iyi nkuru itangaza ko Itegeko ryo kwirukana abo badepite ryatanzwe na Perezida w’Inteko Ishinga Amategeko Mudenda Jacob, bakaba bahise basimbuzwa abandi 14 bahise banatorwa ako kanya, Ishyaka MDC na ryo rikazatanga abandi barindwi hakurikijwe uko bakurikiranaga ku rutonde mu matora aherutse.

Abo badepite birukanywe barimo Tendai Biti wahoze ari Minisitiri w’imari.

Aba badepite bari bariyamamaje mu matora ya 2013 banyuze mu ishyaka riharanira impinduka no kwishyira ukizana MDC riyobowe na Morgan Tsvangirai, baza kurivamo nyuma yo kwanga ubuyobozi bwe.

Morgan Tsvangirai yongeye gutorerwa kuyobora MDC mu Ugushyingo umwaka 2014

Kuva mu 2009 MDC yari ifite imyanya mike muri guverinoma ihuriweho n’amashyaka menshi, ibintu ariko byaje guhinduka ubwo Perezida Robert Mugabe wo mu ishyaka Zanu-PF atsindiye amatora ya 2013.

Aha ni ho bamwe mu barwanashyaka ba MDC bahereye basaba ko Tsvangirai wari umuyobozi wa ryo akaba na Minisitiri w’Intebe icyo gihe, yakwegura nyuma yo gutsindwa, ariko arabyanga, ahubwo abashinja gukorana na Perezida Mugabe.

Ubwo Mudenda Jacob yatangazaga ko birukanywe, abo badepite bahise baherekezwa basohoka mu Nteko Ishinga Amategeko, ariko Tendai Biti we ntiyari ahari.

Si ubwa mbere abarwanashyaka ba MDC bitandukanya na ryo, kuko no mu 2005 uwari Umunyabanga mukuru, Welshman Ncube yarivuyemo akajya gushinga ishyaka rye.

Perezida Mugabe w’imyaka 91 n’ishyaka rye Zanu-PF bari ku butegetsi kuva Zimbabwe yabona ubwigenge mu 1980.

Tendai Biti wahoze ari Minisitiri w’imari ni umwe mu birukanywe