President Robert Mugabe yamaze kwirukana uwari Visi Perezida we Joice Mujuru hamwe n’abaminisitiri munani.

Ikinyamakuru Oeil d’Afrique kivuga ko itangazo ry’umunyabanga mu biro bya Minisitiri w’intebe, Misheck Sibanda, rivuga ko Joice Mujuru akuwe ku mwanya wa visi perezida wa Zimbabwe kubera imikorere ye idahuye n’ibyo yari yitezweho ashyirwa kuri uyu mwanya.

Uyu mugore w’imyaka 59 wakunze kuvugwaho kuzasimbura Perezida Mugabe, kuva muri Kanama yatangiye gushinjwa kurya ruswa no gushaka kugambanira perezida Mugabe ngo yicwe.

Uwahoze ari Visi-Perezida wa Zimbabwe, Joice Mujuru

Ku wa 6 Ukuboza mu nama rusange y’Ishyaka Zanu-Pf, uyu mugore yirukanwe ku buyobozi bw’Urugaga rw’Abagore bo muri iri shyaka, asimbuzwa umugore wa Perezida Grace Mugabe.

Iyirukanwa rya Joice Mujuru ryakurikiwe n’iry’abandi ba minisitiri muri guverinoma, barimo Dzikamai Mavhaire wari ushinzwe ingufu n’uwari umwungirije Munacho Mutezo, Didymus Mutasa, Minisitiri w’Ubutabera Emmerson Mnangagwa n’abandi barimo Nicholas Goche, Francis Nhema na Sylvester Nguni.

Kuri uyu wa gatatu, perezida Mugabe ashobora gushyiraho abasimbura aba birukanwe muri guverinoma ye.

Ku wa mbere, Joice Mujuru yikomye leta n’ibitangazamakuru bimaze iminsi bimuhimbira ibinyoma bigamije kumukura ku buyobozi.