Umukuru w’Igihugu cya Afurika y’Epfo yatangaje ko ubwo inyeshyamba zo mu Mutwe Seleka zafataga Umurwa Mukuru wa Centrafrique, Bangui, zishe abasirikare b’igihugu cye 13 babo.

Zuma yatangaje ko aba basirikare baguye mu mirwano yamaze amasaha agera ku icyenda barwanya amabandi i Bangui. Avuga ko abasirikare 200 bahanganye n’amabandi arenga 1,000 ari bwo abasirikare be 13 bapfaga, 27 bagakomereka.

Nk’uko tubikesha BBC, Afurika y’Epfo yari ifite abasirikare bagera kuri 200 mu Mujyi wa Bangui bashinzwe gusubiza inyuma inyeshyamba za Seleka.

Igisirikare cya Afurika y’Epfo cyasabye Perezida Zuma guhita acyura abasirikare basigaye kugira ngo bave muri ako kangaratete, nyamara Zuma we yatangaje ko nta gahunda afite yo gukurayo izo ngabo, ahubwo ko azoherezayo izo gutera ingabo mu bitugu iziriyo, ibikorwa bigakomeza.

Afurika y’Epfo yohereje ingabo 200 muri Centrafrique muri Mutarama 2013, kuri 400 iki gihugu cyagombaga koherezayo. Mu cyumweru gishize Seleka yiyamye izi ngabo inasaba ko zasubizwa mu gihugu cyabo.

Kuva iki gihugu kibonye ubwigenge mu mwaka wa 1960 cyagiye cyibasirwa n’ibitero by’inyeshyamba.

Ubwo inyeshyamba za Seleka zari hafi kwinjira muri Bangui u Bufaransa bwohereje ingabo zigera kuri 300 zisanga izindi 250 zari yo ngo zibashe kurinda umutekano w’Abafaransa barenga 100 baba muri uyu Mujyi.