Leta ya Repubulika ya Centrafrique n’inyeshyamba zo mu mutwe wa Seleka ziyirwanya bemeranyije gushyiraho Leta y’ubumwe bw’igihugu, mu masezerano yo guhagarika imirwano yashyiriweho umukoni i Libreville muri Gabon.

Amakuru dukesha BBC avuga ko iyo mishyikirano hagati y’impande zombi, yaje kugera ku mwanzuro wo gushyira hamwe nyuma y’iminsi ibiri yari imaze.

Haranateganwa ko muri iki gihugu haba amatora mu gihe cy’umwaka no gushyiraho ministiri w’intebe uturuka ku ruhande rw’abatavuga rumwe na Leta.

Inyeshyamba zubuye imirwano muri Centrafrique mu kwezi gushize, zifata imijyi myinshi kugeza na ho zageze aho zashoboraga kurasa mu murwa mukuru Bangui.