Francois Bozizé, Perezida wa Repubulika ya Centrafrique, arizeza ko hagiye kubaho Leta y’ubumwe bw’igihugu nyuma y’ibiganiro yagiranye n’abamurwanya bagize umutwe wa Séléka i Libreville muri Gabon.

Mu biganiro yagiranye na Perezida Boni Yayi, uyobora Afurika Yunze ubumwe kuri ubu, Perezida Bozizé yagaragaje ko atazongera kwiyamamaza mu matora ateganyijwe muri 2016 anemeza ko ingabo za Séléka zigomba kujya muri Leta nta yandi mananiza nk’uko BBC ibitangaza.

Mu byumweru bitatu byonyine Séléka bafashe intwaro bamaze kwigarurira imijyi igera ku 10 ikomeye muri Centrafrique. Uyu mutwe wigaruriye ibice bikize ku mabuye y’agaciro arimo ’Diamant’, ’Uranium’, Zahabu n’ubundi bukungu nka Peteroli; urabura ibilometero 150 ngo ugere mu murwa mukuru Bangui.

Zimwe mu mpamvu zateye Séléka gufata intwaro ni uko Leta itubahirije amasezerano y’amahoro. Ikindi ni uko uyu ufatanyije n’amashyaka atavuga rumwe na Leta, basaba Bozizé kugira ibiganiro birambuye n’abatavuga rumwe na yo.