Polisi yo muri Repubulika Iharanira Demokarasi ya Congo yahosheje imyigaragambyo ya bamwe mu badepite batishimiye ubutegetsi bwa Kabila ku wa 16 Gashyantare 2013.

Inkuru dukesha Ibiro Ntaramakuru by’Abafaransa bitangaza ko itsinda rigizwe n’abadepite 8 kuri 500 bagize inteko yose batangaje ko bifuza kugeza kuri Perezidansi inyandiko yiyama ubuyobozi bubi bwa Perezida Kabila, babuzwa kwigaragambya.

Kuri uyu wa Gatandatu aba badepite bari bahamagariye abantu benshi kuri Paruwasi yitiriwe Mutagatifu Yozefu kwibuka abantu bishwe mu mwaka wa 1992 baharanira Demokarasi ku butugetsi bwa Mobutu Sese Seko, wayoboye Congo icyo gihe yitwaga Zaire, kuva 1965 kugeza 1997.

Mu gihe bashakaga kwerekeza ku yindi Paruwasi yitwa Saint Raphael, polisi yahise iburizamo urugendo rwabo, ariko bikaba byarakozwe mu mutuzo.

Iyi nkuru ivuga ko bari bitwaje ibitambaro byanditseho ko basaba Demokarasi y’ukuri mu gihugu cyabo.

Guverineri w’intara ya Kinshasa André Kimbuta, yari yabujije abarwanya ubutegetsi kwigaragambya ku bw’impamvu z’umutekano, abasaba kohereza abantu batarenze batanu kuri perezidansi gutangayo inyandiko yabo.