Inama za mbere zibanziriza ibiganiro hagati ya leta ya Congo Kinshasa n’umutwe uyirwanya wa M23, zasubitswe kubera impamvu zitandukanye zirimo no kumvikana ku ndorerezi z’ibi biganiro.

Ibi biganiro bigamije guhosha intambara mu Burasirazuba bwa Congo, byagombaga gutangira ku mugaragaro ku wa gatanu tariki ya karindwi Ukuboza 2012 nyamara si ko byagenze.

Minisitiri wa Uganda ushinzwe umubano mpuzamahanga Henry Okello Oryem, yatangaje ko Minisitiri w’Ingabo Dr. Chrispus Kiyonga nk’umuhuza wa Congo na M23 yahuye n’iyi mitwe yombi ngo baganire ku bagomba kuba indorerezi z’ibi biganiro.

Yagize ati “Hari imiryango myinshi mpuzamahanga yasabye kuba indorerezi muri iyi nama; hari umuryango w’ubumwe bw’Iburayi, Loni, Umuryango wa SADC byose birifuza uwo mwanya, twatindijwe no guhitamo abagomba kwemererwa n’abo guhakanirwa.”

Ushinzwe ibikorwa mu kigo cya Uganda gishinzwe itangazamakuru (UMC) Fred Opolot, yari yatangaje umunsi umwe mbere y’itariki yari kubaho ibiganiro ko iyi nama izibanda ku gushyiraho amategeko azakurikizwa mu biganiro no kureba abazaba bari mu biganiro.

Ikindi kivugwaho kuba cyaradindije ibi biganiro ni uko Umuhuza n’impande ziri mu biganiro batindijwe nanone no guhitamo televiziyo izaba yemerwe guhitisha ibiganiro.

Okello yagize ati “mu gihe bamwe bashakaga radiyo, abandi bashakaga Televiziyo ariko twemeje ko byose tubikemura muri iri joro noneho ibiganiro bigatangira kuri uyu wa gatandatu.”

Ushinzwe umubano n’amahanga muri M23, yatangaje ko 25 bagombaga kuza mu biganiro bageze i Kampala batinze. Yatangaje ko byatewe n’urugendo rutoroshye ku mupaka wa Bunagana, avuguruza amakuru yari yatangajwe mbere avuga ko hari habuze ubwumvikane ku bagomba kwitabira ibiganiro.

Muri ibi biganiro M23 iyobowe n’umunyamabanga wayo Tuyimbaze, mu gihe uruhande rwa Repubulika Iharanira Demokarasi ya Congo iyobowe na Minisitiri w’ububanyi n’amahanga Raymond Tshibanda.